Direkt zum Seiteninhalt

Hauptmenü:

Infos

Rapport annual 2015 Biblioteca populara Mustér e contuorn

Che bibliotecas ein buca mo instituziuns absolutamein necessarias, mobein mintgaton era «loghens cun utilisaziun sensibla (OMEN)» (mira www.bafu.admin.ch) – ha nossa biblioteca stuiu sentir igl onn vargau. Il schaner han numnadamein laders rut en tier nus, la stad han ins anflau asbest en biblioteca ed igl atun essan nus daventai il punct central dalla casa da scola: ils bischels vegls dil scaldament han mess nus per duas jamnas ord funcziun. Aschia che nus havein tuttavia buca saviu selamentar da memia pauca attenziun (e lavur).

Nus havein denton buca seschau irritar ed havein la fin digl onn fatg tutta honur al proverbi:

NOMEN est OMEN (mira sura) – il num ei program:

Per la finiziun digl onn han nossas colluvreras creau in pigniel da Nadal legendar e (nun)descrivibel ord cudischs; el secumponeva da 688 cudischs ed era 2 meters aults – quei ha ei aunc mai dau en Surselva. Massa visitaders han fatg honur al pigniel ils 29 da november, e Helena Lozza da Mustér ha gudignau nossa concurrenza ed il canaster «Ursin».

Jeu savess ussa pia finir miu rapport annual 2015 cun ils plaids NOMEN est OMEN = AMEN, denton fuss quei empau anticipau ed il rapport in tec scursanius.

Opras e strias
Igl avrel ha Iso Camartin raquintau ad in publicum interessau historias sur dalla veta e la carezia el mund dalla musica. Dalla Notg da raquents svizra ils 13 da november han ils scolars dalla 3. e 4. classa da Mustér, Medel e Tujetsch striunau in meglier mund per nus, e quei gest la notg dils attentats terroristics a Paris. Con bein fagess cheu in AMEN, il qual ha la medema muntada ella religiun cristiana sco era ella islamica: aschia seigi ei – sche Dieus vul – ed ils carstgauns sin quest mund savessen viver in sper l'auter en pasch.  

Scolas e Puntreis
Striunar e fascinar lein nus era nos scolars, affons e giuvenils, ils quals fan regularmein diever cun lur famiglias e classas da Mustér, Tujetsch e Medel da nossa purschida actuala.
La nova cruna ch'ei vegnida endrizzada aposta per ils cudischs d'affons e giuvenils possibilitescha a nus da presentar la litteratura romontscha a moda pli surveseivla ed attractiva. Nus engraziein alla Banca Cantunala Grischuna ed alla Fundaziun Winterhalter per il sustegn finanzial.  

In'autra cruna havein nus medemamein empleniu cun cudischs. Il zercladur havein nus quasi fatg in outsourcing. Nus vegnin regularmein a metter a disposiziun als cussadents dil Center da sanadad Puntreis ina schelta da cudischs – cunzun cudischs illustrai – per investa e per far diever. Engraziel fetg per la collaboraziun.

statistica                                 2015          2014            2013   
emprests                               13‘784       13'430          15'393   
novas medias registradas             867           816              709  
novas entradas                            54            33                38

Igl ei reussiu a nus igl onn vargau d'alzar levet schibein il diember d'emprests sco era las entradas. Las uras da lavur prestadas ed indemnisadas en biblioteca muntan a ca. 1'150. Dasperas vegn ei adina aunc prestau lavur voluntaria supplementara.

Jeu engraziel cordialmein a mias colluvreras per la collaboraziun engaschada. Per ellas secapescha ei da sesez da star a disposiziun per engaschis spontans, occurrenzas da scola e scoletta, da Mats e da Bamupi e per auters arranschaments. In cordial engraziament era per la confidonza ed il sustegn dalla vischnaunca purtadra da Mustér e dallas vischnauncas vischinontas da Tujetsch, da Medel e da Sumvitg.

Igl AMEN s'auda en baselgia – ad in bien SEVESER/SELEGER/S'UDIR en biblioteca.

Christina Bischof
schaner 2016

gliendisdis 18.30 - 20.00
mardis 13.30 - 15.00
gievgia 16.00 - 17.30
venderdis 18.30 - 20.00
caum postal
casa da scola
7180 Disentis/Mustér
081/947 52 90

Zurück zum Seiteninhalt | Zurück zum Hauptmenü