Direkt zum Seiteninhalt

Hauptmenü:

Rapport annual 2017

Infos
Rapport annual 2017 Biblioteca populara Disentis/Mustér e contuorn

Cun plascher mirein nus anavos sin la lavur prestada igl onn vargau. Nus essan perschuadidas
che la purschida dalla biblioteca contribuescha alla qualitad da viver en vischnaunca e quei
dat anim a nus bibliotecaras da buca schar luc cun la lavur e cun l’animaziun tier la lectura.
Nossa incumbensa ei da porscher a nossa clientella ed a nossas scolas ina purschida da
medias attractiva ed actuala e d'amplificar ella cuntinuadamein.

Activitads en nossa biblioteca
Era igl onn 2017 han puspei differentas occurrenzas giu liug en la biblioteca ed han aschia
enrihiu la veta culturala da Mustér e contuorn. Buca il davos ei la biblioteca era in impurtont
liug da sentupada per affons da scola, carschi e mummas cun affons pigns.

Cudischs accumpognan nus mintgadi e promovan il svilup digl affon. Aschia lein nus gia
animar ils pli pigns tier la lectura ed havein perquei organisau la primavera ed igl atun
l’occurrenza da «Buchstart», e quei per affons pigns entochen 3 onns.

L’entschatta digl onn havein nus acquistau in beamer. Cun quel havein nus saviu crear ina
nova attracziun per las uras da historias cun Mats, la miur: Il kino da cudischs da maletgs,
nua ch’ei vegn raquintau historias cun projectar ils maletgs vid la preit, vegn appreziaus da
nos giuvens visitaders.

Igl atun havein nus astgau beneventar las scolettas sco era l’emprema e la secunda classa da
Mustér e Tujetsch tier in teater da casperets en biblioteca. L’aventura dil casperet ha
procurau per egls tarlischonts tier ils affons.

Ei legra nus zun fetg che la gronda part dallas scolas da Tujetsch, Medel e Mustér e da niev
era ina gruppa dalla Casa Depuoz visetan regularmein nossa biblioteca. En quei liug in grond
engraziel fetg a scolastas e scolasts per la stimada collaboraziun.

Igl onn passau ha la Pro Juventute Cadi purschiu ensemen cun las bibliotecas dalla Cadi in
abonnament da famiglia gratuit per las annadas 2012, 2013 e 2014. Las famiglias han fatg
stediamein diever da quella purschida, aschia che quella vegn era cuntinuada igl onn 2018.

Las duas prelecziuns “Hanna la Tirolra” cun Linard Candreia (schaner 2017) e “Lanz” cul
giuven autur Flurin Jecker (settember 2017) cun ragischs romontschas ein stadas
interessantas e divertentas ed ein vegnidas frequentadas bein.

La collaboraziun cun Sedrun Mustér Turissem ei vegnida cuntinuada, aschia ch’ils hosps da
Mustér e Sedrun che possedan ina carta da hosps astgan vinavon selegrar digl access gratuit
a nossa biblioteca ed alla biblioteca digitala (www.dibiost.ch).

Duront l’jamna bibliotecara Grischuna (settember 2017) havein nus lantschau la
concurrenza «book-selfie». Ils participonts han giu l’incumbensa da far in selfie cun in
cudisch. Ord 81 fotografias fetg originalas ha la cumissiun bibliotecara lu eruiu la victura
Sabrina Sgier. Ella ha gudignau in squitschader da polaroid mobil.

Naven dalla stad tochen la fin digl onn havein nus astgau beneventar ina praticanta en
nies miez. Claudia Foppa Caviezel ei lundervi da reactivar la biblioteca dil gimnasi dalla
claustra da Mustér (GKD) ed ha aschia saviu rimnar experientschas en nossa biblioteca.
Nus havein giu plascher ch’ella ei stada ina part da nies team.

Giubileum
Madleina Caminada ha astgau festivar siu giubileum da 30 onns bibliotecara. Paucs onns
suenter la fundaziun igl onn 1984 eis ella entrada el survetsch dalla biblioteca. Madleina
exequescha la lavur cun gronda pissiun ed engaschi, e nus engraziein cordialmein ad ella per
la preziusa collaboraziun.

statistica                                2017                     2016                     2015
emprests                              12’801                  12’254                    13’784
novas medias registradas            940                    1’024                        867
novas entradas                          42                        51                          54
cartas da hosps 35

Engraziament
Alla fin lein nus engraziar cordialmein a nos gronds e pigns clients. Per lur interess multifar
vid la biblioteca, lur marvigliusadad vid nossas novas medias e pils plaids affirmativs, denton
era per tips ed inspiraziuns, che nus prendein bugen encunter e che motiveschan adina
puspei nus danovamein.

Nus engraziein alla vischnaunca purtadra da Mustér e las vischnauncas vischinontas da
Tujetsch, Medel e Sumvitg pil sustegn finanzial dil menaschi bibliotecar, che vegn la finala
adabien a nossa populaziun ed als affons da scola dalla regiun.

Tgi che cala da vuler vegnir megliers, cala d’esser buns. Perquei vegnin nus vinavon a
s’engaschar cun bia plascher ed elan per esser actuals, per porscher in bien survetsch sco era
metter nies focus aunc pli ferm sin nossa clientella.

Susanna Venzin
Curaglia/Mustér, fevrer 2018

gliendisdis 18.30 - 20.00
mardis 13.30 - 15.00
gievgia 16.00 - 17.30
venderdis 18.30 - 20.00
caum postal
casa da scola
7180 Disentis/Mustér
081/947 52 90

Zurück zum Seiteninhalt | Zurück zum Hauptmenü