Direkt zum Seiteninhalt

Hauptmenü:

Rapport annual 2018

Infos
Rapport annual 2018 Biblioteca populara Disentis/Mustér e contuorn

«Tgi che legia sa dapli», stat ei sil placat che nus havein schau squitschar per l’EX18. Quella parola ei il medem mument il motto pil team dalla Biblioteca populara Disentis/Mustér e contuorn. Igl ei nossa finamira da metter a disposiziun per giuven e vegl ina vasta purschida actuala da cudischs ed autras medias. Igl onn 2018 havein nus cumprau 940 medias novas (cudischs, cudischs auditivs, DCs e DVDs) en la valeta da ca. 8'000 francs. Ultra da quellas medias analogas han nos abonnents era access alla biblioteca digitala dibiost.

Promoziun dalla lectura
Tier las incumbensas d’ina biblioteca s’auda ei denton buca mo dad empristar cudischs, mobein era dad animar e promover da leger. Per cumpletar nossa purschida ella sparta dalla promoziun dalla lectura e far quella pli attractiva, ha nossa collaboratura Manuela Venzin frequentau differents cuors. Cun las experientschas fatgas leu sa ella ussa cumpletar las introducziuns e visetas da classa. Aschia legra ei nus che nus havein era igl onn 2018 puspei astgau beneventar regularmein en nossa biblioteca numerusas classas da Mustér e Sedrun sco era ina gruppa dalla Casa Depuoz. Dasperas han era occurrenzas per affons prescolars giu liug regularmein, sco p.ex. «Buchstart» e «Mats» cun raquintar historias e kino da cudischs da maletgs. En quei connex lein nus engraziar alla Pro Juventute Cadi ch’ella ha era igl onn 2018 purschiu als affons dallas annadas 2014/15 in bon per in abonnament gratuit ellas bibliotecas dalla Cadi.

Occurrenzas
Il mars havein nus astgau beneventar en biblioteca la giuvna autura Cornelia Vinzens che ha legiu ord siu cudisch «Nus savevan da nuot auter». La prelecziun ei vegnida accumpignada musicalmein da Fiona Cavegn. Tier in pign apero han ils numerus visitaders giu suenter la pusseivladad da brattar atgnas regurdientschas da temps vargai. Al «Di svizzer da preleger» havein nus envidau ad in’occurrenza da «Buchstart» per geniturs cun affons pigns. A caschun dil campiunadi mundial da ballapei la stad havein nus organisau per pigns e gronds fans da ballapei ina buorsa da brat da Panini. En collaboraziun cun la scola ha giu liug il november ina prelecziun dall’autura da cudischs per giuvenils Andrea Gerster pil scalem superiur. Pils affons da scoletta ei il Casperet staus sin viseta. La finiziun da quellas occurrenzas ha la finala il «Caffè d’advent» fatg il december.

Team
Naven digl uost 2017 tochen igl avrel 2018 ha nossa collega Susanna Venzin frequentau il cuors fundamental dalla Cuminonza da lavur dallas bibliotecas svizras da lectura publica (CLP) alla Biblioteca cantunala a Cuera. Il matg ha ella astgau prender encunter il certificat dalla CLP.
Deplorablamein ei nossa menadra Christine Bischof vegnida malsauna avon in onn. Madleina Caminada ha surpriu ad interim la substituziun. Igl atun 2018 ei Ulrike Lechmann vegnida eligida sco nova menadra.                                                                                                                                                   
Igl october 2018 havein nus astgau beneventar cun Petra Schmid ina nova collega. Ei fa plascher a nus da puspei haver ina representanta da Sedrun el team.
Il december ha nossa collega Madleina Caminada terminau siu engaschi. Duront 31 onns ha ella luvrau cun bia entusiassem per la biblioteca. Per sia grondiusa lavur engraziein nus ad ella da cor. Madleina Caminada ei stada responsabla pil ressort finanzas che vegn ussa surprius da Nadja Hosang.

statistica                                        2018                  2017            2016
emprests                                      13’634                12’801          12’254
novas medias registradas                    892                    940            1’024     
novas entradas                                   40                     42                 51       

Engraziament
Alla fin lein nus engraziar alla vischnaunca purtadra da Mustér sco era allas vischnauncas vischinontas da Tujetsch, Medel e Sumvitg per lur sustegn finanzial.
In special engraziament s’auda a tut ils visitaders che nezegian nossa purschida e dattan veta a nossa biblioteca. Nus giavischein ad els ch’els fetschien l’experientscha: «Tgi che legia sa dapli».


Ulrike Lechmann / Susanna Venzin
Mustér, fevrer 2019

gliendisdis 18.30 - 20.00
mardis 13.30 - 15.00
gievgia 16.00 - 17.30
venderdis 18.30 - 20.00
caum postal
casa da scola
7180 Disentis/Mustér
081/947 52 90

Zurück zum Seiteninhalt | Zurück zum Hauptmenü