Direkt zum Seiteninhalt

Hauptmenü:

Rapport annual 2019

Infos
Rapport annual 2019 dalla Biblioteca populara Disentis/Mustér e contuorn

Dapi l'entschatta 2019 meina in team da tschun dunnas la biblioteca, numnadamein Nadja Hosang, Manuela Venzin ed Ulrike Lechmann da Mustér, Susanna Venzin da Medel e Petra Schmid da Tujetsch. Mintga collaboratura ei responsabla per ina sparta determinada, il medem mument denton era per il funcziunament digl entir menaschi. Quella repartiziun d'incumbensas e da responsabladads para da secumprovar e nus astgein mirar anavos sin in onn variont cun differentas occurrenzas e purschidas.
Il schaner havein nus remplazzau il computer principal e segirau da niev nossas datas en in sistem da cloud. Ultra da quei ha ei dau il zercladur ina midada ella cataloghisaziun. Sco tut ils commembers dalla cuminonza da cataloghisar biblio.gr havein nus surpriu da niev las reglas internaziunalas da cataloghisar RDA. Per sepreparar sin quella midada han duas collaboraturas frequentau mintgamai dus cuors. El fratemp essan nus tuttas introducidas bein el niev sistem e profitein duront cataloghisar digl access al pool da datas dil Survetsch svizzer da bibliotecas.
Ils davos treis onns han era ils hosps da vacanzas saviu profitar dalla purschida dalla biblioteca cun la carta da hosps da Sedrun Mustér Turissem. Sin la sesiun da stad 2019 ei quella purschida da Sedrun Mustér Turissem deplorablamein vegnida strihada. Sco recumpensa offerin nus als hosps da vacanzas in abonnament da hosps per 10.- francs il meins.
Danovamein havein nus astgau profitar dalla collaboraziun cun la Pro Juventute Cadi che schenghegia als affons da quater tochen tschun onns bons per in abonnament da famiglia dalla biblioteca. Quels bons vegnan duvrai stediamein e la biblioteca astga selegrar dalla viseta da numerusas famiglias giuvnas. Per quei sustegn prezius a favur dalla promoziun dalla lectura engraziein nus cordialmein alla Pro Juventute Cadi.
A caschun dil teater el liber «La stria da Dentervals» havein nus organisau il mars ina prelecziun cun igl autur Hubert Giger. Nus havein giu grond plascher che l'occurrenza ha svegliau ton interess: nus havein astgau beneventar 40 audituras ed auditurs en nossa biblioteca. Duront igl apero suandont ha ei aunc dau la pusseivladad da discutar in cun l'auter e cun igl autur.
Per ils affons e giuvenils havein nus purschiu las occurrenzas regularas sco «Buchstart» (affons pigns), Mats (historias per affons dalla vegliadetgna prescolara) e visetas guidadas per classas. Per quellas stattan a disposiziun a nus novissimamein quater iPads che nus havein saviu acquistar grazia ad in sponsur generus. Ultra da quei havein nus purschiu il settember duront l'jamna bibliotecara cul tema «aviert e colligiau» in'aschinumnada «Makerspace-Toolbox» cun differents roboters. Quellas occurrenzas roboticas ein vegnidas visitadas bein. La finamira da talas purschidas sin plaun svizzer ei d'arver la biblioteca sco liug da sentupada sco era per autras activitads ed aschia era da plidentar in publicum ch'ei meins interessaus alla lectura.
2019 havein nus saviu cumprar 776 novas medias. In niev element en nossa purschida da medias ein las figuras da «Tonie», portatuns dirigi via WLAN cun raquents e musica per affons.

Cun 15'766 emprests cumparegliau cun 13'634 igl onn vargau havein nus puspei saviu augmentar nies diember d'emprests. Quei legra nus naturalmein fetg e motivescha nus da tgirar vinavon nossa purschida actuala e d'introducir a medem temps era novas purschidas ed occurrenzas.Per ina biblioteca eis ei impurtont da saver porscher cudischs attractivs ed autras medias interessantas. Gest aschi impurtontas ein denton era las persunas che fan diever da quella purschida. En quei senn engraziein nus a tut nossa clientella per igl interess e las numerusas visetas. Medemamein engraziein nus allas vischnauncas che possibiliteschan quella purschida preziusa a favur dalla cultura e promoziun dalla lectura: alla vischnaunca da Mustér sco purtadra, denton era allas vischnauncas da Tujetsch, da Medel e da Sumvitg per lur sustegn finanzial.


Ulrike Lechmann / Susanna Venzin
Mustér, fevrer 2020


gliendisdis 18.30 - 20.00
mardis 13.30 - 15.00
gievgia 16.00 - 17.30
venderdis 18.30 - 20.00
caum postal
casa da scola
7180 Disentis/Mustér
081/947 52 90

Zurück zum Seiteninhalt | Zurück zum Hauptmenü