Direkt zum Seiteninhalt

Hauptmenü:

Rapport annual 2020

Infos
Rapport annual 2020 dalla Biblioteca populara Disentis/Mustér e contuorn
Sala pleina a Salaplauna la sera dils 15 da schaner 2020. La prelecziun cugl autur Arno Camenisch che la biblioteca ha organisau ensemen cul Center sursilvan d’agricultura, ei stada in success cumplein ed ha attratg ver 100 persunas. Arno Camenisch ha legiu ord siu novissim cudisch «Herr Anselm» ed ord autras ovras. Sco adina ha Arno Camenisch giu buna accoglientscha tiel publicum. Ei regeva in’atmosfera cuntenta e suenter la prelecziun han bia visitaders gudiu igl apero e tedlau in discuors cugl autur.
Aschi plein slontsch sco igl onn niev ha entschiet, aschi anetg essan nus vegni frenai il mars. Il coronavirus ha sfurzau nus d’annullar tut las ulteriuras occurrenzas, pia era l’appreziada ura d’historias «Mats» per affons pigns che nus havein saviu realisar igl onn 2020 mo il schaner e fevrer.
Naven dils 13 da mars entochen ils 11 d’avrel ei nossa biblioteca stada pertuccada dil lockdown. Per saver survir nossa clientella cun litteratura era duront quella pausa sfurzada, havein nus purschiu in survetsch d’empustaziun e da retratga. Plinavon ha ei dau la pusseivladad d’untgir sin la biblioteca digitala Dibiost, alla quala tut la clientella cun in abonnament dalla biblioteca ha giu access gratuit. In motiv per buna luna en quei temps ein las legras lieurs da Pastgas stadas ch’ils affons da scoletta da Pia Condrau han zambergiau.
Il zercladur ha il team dalla biblioteca astgau beneventar l’incumbensada dallas bibliotecas dil cantun Grischun, Olivia Fehlmann, e Petronella Däscher, la presidenta dalla cumissiun bibliotecara. Ellas visetan mintg’onn in diember da bibliotecas grischunas per emprender d’enconuscher meglier quellas. Il discuors direct a caschun d’ina viseta sil liug lubescha da brattar informaziuns specificas davart la biblioteca e da tgirar il contact. Nus havein saviu prender encunter custeivels impuls per optimar e sviluppar nossa biblioteca.

La stad ha ei per fortuna dau in temps da sluccada e nus havein puspei astgau retscheiver dapli visitaders ella biblioteca, denter quels era numerus hosps da vacanzas, ils quals schazegian fetg la purschida dalla biblioteca. Plinavon ha Manuela Venzin purschiu duront las vacanzas da stad dus cuors pil pass da vacanzas da Pro Juventute.
Gia il settember ei la situaziun da corona puspei vegnida pli critica e nus havein gest aunc saviu far las introducziuns da classa per las scolas da Mustér. Las introducziuns da classa culs scolars da Sedrun han deplorablamein buca pli saviu vegnir purschidas.
Perfecziunament ei malgrad tut stau pusseivel. Aschia han duas collaboraturas frequentau il schaner in cuors da profundaziun pil diever optimal da nies program da biblioteca. Igl atun ha Manuela Venzin absolviu il cuors grischun per menadras e menaders da bibliotecas. Dils temas tractai el cuors savein nus tuts profitar: nus restein à jour dil svilup bibliotecar e savein intensivar il brat cun autras bibliotecas.
Tochen la fin 2020 han famiglias cun affons pigns survegniu dalla Pro Juventute Cadi in abonnament gratuit per las bibliotecas ella Cadi. Nus havein plascher che quella purschida vegn era suenter ina restructuraziun cuntinuada da niev da Pro Junior.
Igl onn bibliotecar 2020 ei ius a fin cun in’ulteriura serrada dalla biblioteca. Perquei eis ei stau pusseivel mo in cuort temps per nos visitaders d’admirar ils aunghels originals che la 1. e 2. classa primara da Sedrun han zambergiau tier Nicoletta Marino. E l’historia d’advent per nos pli giuvens visitaders ha ei buca dau en biblioteca, mobein online sin nossa pagina d’internet.
Malgrad nossa purschida alternativa (survetsch d’empustaziun e Dibiost) han las serradas dalla biblioteca e las restricziuns da corona influenzau las cefras d’emprest. Aschia munta il diember da medias empristadas igl onn 2020 mo a 11'245 en cumparegliaziun cun 15'766 igl onn 2019.
Nus engraziein a nossa clientella per sia flexibilitad e fideivladad ch’ella ha demussau malgrad ina biblioteca serrada e restricziuns da corona. Era allas vischnauncas da Mustér, Medel, Sedrun e Sumvitg engraziein nus per lur sustegn. Nus sperein ch’ei vegni prest puspei ad esser pusseivel d'organisar differentas occurrenzas e da s’entupar luccamein en la biblioteca.



Ulrike Lechmann / Susanna Venzin
Disentis/Mustér, il fevrer 2021

gliendisdis 18.30 - 20.00
mardis 13.30 - 15.00
gievgia 16.00 - 17.30
venderdis 18.30 - 20.00
caum postal
casa da scola
7180 Disentis/Mustér
081/947 52 90

Zurück zum Seiteninhalt | Zurück zum Hauptmenü